Act 1 | KYG | STEP | Tiyofalasigae, hu'na, Nagaemo hogote'na kagaefe'mo mago mukufi'mo Yesu'a ali'ya'amo aepa faino ali'niya afinateti'e ali'ya alime alime ne'egeno'ae'mo Goti'a koku'napi'mo avalelino hai'niya afina'efe'mo Yesu'a muki hu'niya kava'e alino apaya male'niya ge'a'e'mo ava gemo hu'na avo'mo kae'nove. Yesu'a Goti Auneme'amo himamu'aleti'mo apa vaya'amo lekana paino ne'apateya vaya'aife'mo huno'ae'mo, Ma ali'ya'mo alitapa maiyo, huno hapa paitegeno Goti'a avalelino koku'napi'mo hai'niye.

Acts 1

Yesu'a, Goti Auneme'amo lapakaetegamo ali'na atesugeno eminegaiye, huno hapa pai'niya gemae

1 Tiyofalasigae, hu'na, Nagaemo hogote'na kagaefe'mo mago mukufi'mo Yesu'a ali'ya'amo aepa faino ali'niya afinateti'e ali'ya alime alime ne'egeno'ae'mo Goti'a koku'napi'mo avalelino hai'niya afina'efe'mo Yesu'a muki hu'niya kava'e alino apaya male'niya ge'a'e'mo ava gemo hu'na avo'mo kae'nove. Yesu'a Goti Auneme'amo himamu'aleti'mo apa vaya'amo lekana paino ne'apateya vaya'aife'mo huno'ae'mo, Ma ali'ya'mo alitapa maiyo, huno hapa paitegeno Goti'a avalelino koku'napi'mo hai'niye. 3 Yesu'a fali'niyateti'mo he tino'ae'mo apaulagale'mo foti'a afinapati'mo alu afina alu afina'mo afole aite afole aite huno afole ai'niye. Agaemo muki afina'mo muki kava'amo apaulagale'mo hu'nige'a agete'apae'mo, ago he tino afa'a mai'niye, hu'a magoke apakesa afi'nae. Afole aino mai'neno'ae'mo Goti'a yagaino ne'apateya kavafe'mo alino apaya male'niye. 4 Yesu'e apa vaya'a'e'mo ali'a anupa hu'a mai'ne'apae'mo hapa paino'ae'mo, Yulusalemu taonifi'mo ataletapa o'utapa mai'niyo. Afo'nimo'a, lapakaetegamo ali'na atesugeno emi'negaiye, huno naha pai'nige'na ava gemo hu'na lapa pai'nova vekae'mo agava maiyo. 5 Yoni'a anilafapi'mo faleno apateteno'ae'mo ketogufa afina'mo utesige'na Goti Auneme'aleti'mo fale'na lapategauve, huno hapa pai'niye.

Yesu'a koku'napi'mo hai'niya gemae

(Mak 16:19-20; Luk 24:50-53)

6 Apa vaya'a'e Yesu'e'mo ali'a anupa hu'a mai'ne'apae'mo Yesufe'mo, Ala kava nene, hu'a, Hemenimo halate Yu vaya'mogita alika he tika latesanageta muki vaya'aite'mo yagaita apatesupiye, hu'a afi ge'nageno'ae'mo, 7 Afo'nimo'mo lekana pai male'niya afina'e kanale'e'mo agai'a yanageno hainu afina'mo afole aisifigetapa o'afigae. 8 O'afigaya'monanafa Goti Auneme'amo aote Auneme'amo lapakaetegamo emineno ayamufa huno lapatesigetapa Yulusalemu taonifinagi muki Yutiya kotegagi Samaliya kotegagi muki ma mopamo lole'e lole'e atupalegagi hutapa nava gemo aeta hakalo hutapa hapa paite hapa paite hutapa hapa paigae, huno hapa paitegeno'ae'mo 9 Goti'a koku'napi'mo avalelino haino hiyapi'mo fale'nige'a age'nageno haino lageso hu'niye. 10 Koku'napi'mo aulu he'a age'a mai'nage'anae'mo lole vekala'mo yaveyave kukena vaili'na'a vekala'mo malage hu'ana afole aite'anae'mo apakae'e'mo magokepi he ti'ana mai'na'ae. 11 Mai'ne'anae'mo, Galeliya vayane, hu'ana, Na kava higetapae'mo koku'napi'mo aulu nehae. Ani vekamo Yesu'a lapakae folagapati'mo Goti'a koku'napi'mo avalelino hai'nigetapa agaya kava huno halate eminegaiye.

Yutasi aimu'yale'mo mago vekamo lekana pai'a ate'naya gemae

12 Apa vaya'mo avemo agi'amo Alifi'aepalegamo atale'a halate Yulusalemu taonifi'mo u'a ava'yi hu'nae. Alifi'aepa avemo Yulusalemu haopale'mo hane'nige'a aise'a yatala hugekana ka'mo sapati afina'mo u'e'a nehaya agufa aupa ka'mo hane'niye. 13 U'a ava'yi hute'apae'mo nehavaya nopi'mo anaga aeno anagi male'niya nopilagamo hai'a mai'nae. Ani nopi'mo mai'naya vaya'ai apaki'apimo hane'niye. Pita'ae, Yoni'ae, Yemisi'ae, E'nalu'ae, Filipi'ae, Tomasi'ae, Matolomiyu'ae, Matiyu'ae, Alifiyasi mafa'nemo Yemisi'ae, Yu vaya'aite'mo apakai'apile'mo yagaisayafe'mo hau'niya vekamo Saimoni'ae, Yemisi mafa'nemo Yutasi'ae. 14 Ani vayanagi mago'e a'nenaganagi Yesu ita'amo'mo Maliya'agi Yesu agana'amogimogi hu'a magoke apaipa apakesamo ali'a mai'ne'a ali'a anupa hu'a mai'ne'a nunumu'mo huge ge hu'a afige hu'a mai'nae.

15 Ketogufa'a afina'mo utege'apae'mo konaga vaya'mo vani hataleti tuveti'a vaya'mo ali'a anupa hu'a mai'ne'apae'mo Pita'a he tino hapa paino'ae'mo, 16 Vaya'nimogitapae, huno, Goti Auneme'amo'mo akeya'vilaga Yutasi'a Yesu'mo atafau'a kalavusi hu'a atesaya vaya'mo ka'mo alino ho huno apave li'niya vekamo'a hisiya kavafe'mo ava gemo laginago vekamo Nevinife'mo ha pai'nigeno avo'mo ago kae male'niye. Ani avo'mo kae male'niya gemo ago afole ai'niye. 17 Yesu'a lekana paino ate'nigeno lagae'e'mo magokepi lokaeno ali'ya'mo alino mai'niye, huno hapa pai'niye. 18 Yutasi'a ani agufa hosu kava'mo hu'nige'apae'mo miya'mo ami'nae. Miya'mo aliteno uno mago mopamo miya faiteno ani mopale'mo asagauno ai'nigeno aipamo aino lakufaeno aino apalo atino asagauno ai'niye. 19 Muki Yulusalemu taonifi mai'naya vaya'mogi ani gemo afite'apae'mo ani mopamo agi'amo Kolakayagae hu'a agi ate'nae. Yu gefati'mo agi'amo, Aikelatamagayagae, hu'a agi ate'nae. 20 Pita'a mago'e gemo huno'ae'mo, Ani vekae'mo ava gemo Samu Mukufi'mo avo'mo kae male'niyana,

Mago vekamo'a agae nopi'mo haino o'maisigeno afa'a hanegaiye,
huno avo'mo kae maleteno mago'e gemo Samu Mukufi'mo avo'mo kae male'niyana,

Mago alu vekamo'mo agae aimu'yale'mo eno ali'ya'mo aligiye,
huno avo'mo kae male'niye. 21 Avo'mo kae male'niya'mofe'mo mago vekamo lagaepati vekamo'a Yesu'a fali'niyateti'mo he ti'niya kavafe'mo faigoko ge'amo huno aeno hakalo huno hapa paisiyafe'mo lekana paita ategaune. Yoni'a ani'mo faleno ne'apateya afinateti'mo maime maime eno Yesu'a koku'napi'mo avalelino hai'niya afina'mo mai'niya vekamo Yesu'e lagae'e'mo magokepi lokaeno umenitata huno mai'niya vekamo lekana paita ategaune, huno hapa pai'niye. 23 Lole vekala'mo Yosefe'a alu agi'amo Masamasi'a mago'e huno alu agi'amo Yasatasi'a lekana pai'a atete'a Mataiyasi'a lekana pai'a anate'nae. 24 Lekana pai'a anate'ne'ana nunumu'mo hu'apae'mo, Ala kava nene, hu'a, Muki vaya'ai apaipafi'mo ne'apakane. Mani lole vekalapati'mo lekana paika ate'nisana vekamo alika lave liyo. 25 Yutasi'a ali'ya'amo ataleno uno faliteno ko'alegamo lamino mai'niya'mofe'mo lekana paika ate'nisana vekamo'a Yutasi aimu'yale'mo eno apa vekamo mai'neno Yutasi'a ali'ya ali'niya ali'ya'mo aligiye, hu'a nunumu'mo hu'nae. 26 Anaki'animo aote aote yate'mo avo'mo kaete'a male'nageno Mataiyasi agimo afole ai'nige'a apakaemo leveni'a apa vaya'e'mo avale'a ali'a magokepi lokae'a ate'nae.